ရူပဗေဒဘာသာရပ်မှာ အရာဝတ္တုတွေရဲ့ အလင်းပြန်ခြင်းအကြောင်းသင်ရတဲ့အခါ။ မှန်သာပြင်လိုညီညာတဲ့ မျက်နှာပြင်ကိုအလင်းတန်းတွေကျရောက်တဲ့အခါ တစ်ချို့က မှန်သားကိုဖေါက်ထွက်သွားတယ်။ တစ်ချို့ကအလင်းလာရာဆီကိုပြန်လာတယ်။ တစ်ချို့ကဘေးဘီကိုပြန့်သွားတယ်တဲ့။ ဒါပေမဲ့ အလင်းတန်းက ဘယ်တော့မှကွေ့ကေါက်မသွားဘူး။ မျင်းဖြောင့်လို ဖြောင့်ေ့ဖြာင့်တန်းတန်းသာသွားတယ်။ ဒါက သက်မဲ့ အရာတွေရဲ့ သဘာဝနိယာမ။ တနည်းအမှန်တရား ( ၀ါ) ပါဌိစကားနဲ့သစ္စာတရား။
ဖန်သားကို ဖေါက်သွားမဲ့ အလင်းတန်းတွေကို ဖေါက်မသွားအောင် ဖန်သားနောက်ကို ပြဒါးသုတ်ထားမယ်ဆိုရင် ဖန်သားရှေ့မှာထားတဲ့ အရာဝတ္တုတွေရဲ့ ပုံသဏ္ဍန်အတိုင်းဖန်သားပြင်မှာပေါ်လာတယ်။ ကျမတို့နေ့စဉ် ကြည့်နေကြတဲ့ မှန်ဖြစ်လာတယ်။ အလင်းတန်းနဲ့မှန်သားပြင်တို့ရဲ့ နိယာမကြောင့် ကိုယ့်မျက်နှာကချော်ရင်ချော်တဲ့အတိုင်း၊အရုပ်ဆိုးရင်ဆိုးတဲ့အတိုင်းအမှန်အတိုင်းပေါ်လာတယ်။ ရုပ်ဆိုးသူက ဘယ်လိုပဲ လှချင်ချင် မှန်ကတော့ ရုပ်ဆိုးပုံပဲ ပြမှာပါ။
ကျမတို့ငယ်ငယ်က တိ၇ိစ္ဆာန်ရုံကိုသွားတဲ့အခါ အဲ့ဒီမှာမှန်တစ်ချပ်ရှိတယ်။ သူ့ရှေ့မှာသွားရပ်ရင် တကိုယ်လုံး တွန့်လိန်ပြီး ကိုယ်မှန်းတောင်မသိနိုင်ဘူး ဘာကြောင့်လဲ ? ရူပဗေဒ ပညာက ဆိုတယ်။ အလင်းတန်းကျတဲ့မျက်နှာပြင်က မညီညာဘူးဆိုရင် အလင်းပြန်တာတွေလဲမညီဘူးတဲ့။ မျက်နှာပြင်က ခုံးနေမယ်ဆိုရင် အလင်းတန်းတွေကခုံးနေတဲ့ မျက်နှာပြင်ရဲ့နောက်မှာစု ကြတယ်တဲ့ ။ ဒါပေမဲ့ အလင်းတန်းတွေရဲ့နိယာမဖြစ်တဲ့ ဖြောင့်ဖြောင့်သွားခြင်းကိုတော့ဆက်လက်ထိမ်းသိမ်းကြတာကြောင့် မျက်နှာပြင်ခုံးတဲ့အချိုးအတိုင်း အလင်းတန်းစုတဲ့ အကွာအဝေးကလဲတူညီတယ်။ ဒီ နိယာမကြောင့် အနီးမှုန် တဲ့သူတွေ အနီးမြင်အောင် စာကြည့်မျက်မှန်တွေတည်ထွင်နိုင်ခဲ့ကြတယ်။ မျက်နှာပြင်ချိုင့်နေတဲ့ မှန်တွေကတော့ သူ့ပေါ်ကျလာတဲ့ အလင်းတန်းတွေကို ပြန့်ကာစေတယ်တဲ့။ ဒီ နိယာမကိုအသုံးချပြီး အဝေးကြည့်မျက်မှန်တွေတီထွင်နိုင်ခဲ့ကြတယ်။ တိ၇ိစ္ဆာန်ရုံက မှန်မျက်နှာပြင်ကို အခုံးတွေအခွက်တွေနဲ့လုပ်ထားတာကြောင့် ပုံမှန်ထွက်မလာပဲ သရဲလိုလို ထွန့်လိန်နေတဲ့ ပုံဆိုးကြီးထွက်လာတာပါ။
သူယုတ်မာဆိုတာ သူ့အပေါ် ကောင်းကောင်းမွန်မွန်ဆက်ဆံပေမဲ့ အရုပ်ဆိုးတဲ့အသွင်အပြင်တွေနဲ့ပြန်လဲဆက်ဆံတဲ့ မှန်ရုပ်ဆိုးနဲ့တူတဲ့ သူတွေလို့ပြောရမယ်ထင်တယ်။
မှန်ရုပ်ဆိုးတွေအစား ကြည့်တဲ့သူရဲ့ ပုံကိုလှလှပပလေးမြင်မဲ့ မှန်လှလှလေးဆိုရင်ဘယ်လောက်ကောင်းမလဲ။ လူတိုင်း ကိုယ့်ပုံလှလှလေးမြင်ချင်မှာ ဘာလို့ အဲ့ဒီမှန်မျိုး မတည်ထွင်ကြတာလဲ ။ တည်ထွင်ရခတ်ခဲလို့လား ?။
သူတော်ကောင်းဆိုတာကိုယ့်အပေါ် ယုတ်ယုတ်မာမာပြုမူပေမဲ့ အပြစ်မယူ ကောင်းကောင်းမွန်မွန်ပြန်လဲဆက်ဆံတဲ့ သည်းခံတတ်တဲ့သူ။ မြတ်ဘုရားက သည်းခံခြင်းဆိုတာအလွန်ကောင်းမွန်တဲ့ တ၇ားဖြစ်တယ်။ ရန်ဟူသမျှကို အောင်နိုင်တယ်တဲ့။ အကျင့်ခက်ပေမဲ့ ကျင့်လို့ရနိုင်တဲ့တရားတဲ့။
ကိုယ်ကဘယ်လိုမှန်မျိုးလဲ။ မျက်နှာပြင်ညီညာပြီး အမှန်အတိုင်းပုံဖေါ်တဲ့သူလား ? ကိုယ်ငယ်စဉ်ကတော့ လူတိုင်းကိုမှန်လို ဆက်ဆံတယ် လို့ဂုဏ်ယူစွာ ကြုံးဝါးခဲ့ဘူးတယ်။ ကိုယ့်ဟာနဲ့ကိုယ်ကောင်းလှပြီလို့ထင်ခဲ့မိတယ်။ မှန်ရုပ်ဆိုးလိုလူမျိုးနဲ့ နှိုင်းရင်တော့ ဟုတ်တုတ်တုတ်ပဲ။ မှန်လှလှလေးဖြစ်ချင်ရင်တော့ အများကြီး ကြိုးစားရအုံးမယ်။
JICA center မှာ ၁၉၈၆-၈၈ နေစဉ်က တနင်္ဂနွေနေ့တွေမှာ ကျောင်းသားတွေကိုအိမ်ဖိတ်ထမင်းကြွေးတဲ့ ဂျပန်လင်မယားနဲ့ဆုံခဲ့ပါတယ်။သူတို့လင်မယားက အသက် ၆၀ ၀န်ကျင်၊ ပင်ဆင်စားတွေ။ သားသမီး ၂ ယောက်ထွန်းကားပေမဲ့အဝေးမှာသူ့အိမ်ထောင်နဲ့သူ မို့ တစ်နှစ်တခါသာ မိဘစီလာနိုင်ကြတယ်။ အဖိုးကြီးလင်မယားလဲ အထီးကျန်ဆန်တဲ့ သူတို့ဘ၀ကိုသက်သာစေဖို့ JICA cente ကကျောင်းသား ၄-၅ ယောက်ကိုသူတို့အိမ်ထမင်းဖိတ်ကြွေးလေ့ရှိတယ်။ ကျမတို့အဖွဲ့လဲ အိမ်ရှင်လင်းမယားနဲ့စားသောက်ပြီး။ ၀ိုင်းသိမ်းကြ၊ အတူတူဆိုကြ ကကြ။ ပြန်ကာနီး ကန်တော့ပြီးမှပြန်ကြပါတယ်။ ကျမတို့ ကိုတွေ့ပြီးနောက်ပိုင်း အဲ့ဒီလင်မယားက တစ်ခြားနိုင်ငံကကျောင်းသားတွေမဖိတ်တော့ဘဲ ကျမတို့အဖွဲ့ကိုပဲဖိတ်ပါတယ်။ သူတို့ ငယ်ငယ်က ကျမတို့လိုပဲ လူကြီးသူမတွေကိုရိုသေလေးစားကြကြောင်းတမ်းတမ်းတတ ပြောကြပါတယ်။
နောက်ထမင်းဖိတ်ကြွေးတဲ့သူကတော့ ဒုတိယကမ္ဘာစစ်တုံးက မြန်မာပြည်ကို စစ်ဗိုလ်အဖြစ်နဲ့ေ၇ာက်ခဲ့ဘူးတဲ့ စစ်ပြန်တစ်ဦးပါ။ သူကတော့ မြန်မာတွေကစစ်အတွင်းကသူ့ကိုကယ်ခဲ့ကြလို့ ကျေးဇူးစပ်တဲ့အနေနဲ့ မြန်မာကျောင်းသားတွေကို ထမင်းဖိတ်ကြွေးတဲ့သူပါ။
ဒီ ဂျပန်မိသားစု နှစ်ဦးက မျက်နှာပြင်ညီညာတဲ့ မှန်သားပြင်လို လူတွေလား ? ၊ ဒါကြောင့် မေတ္တာရောင်ပြန်ဟတ်တယ်လို့ပြောကြတာလား ?
Okinawa ကျွန်းကဂျပန်တွေကတော့ ကျန်တဲ့ ကျွန်းတွေကဂျပန်တွေကိုအခုထက်ထိ အခဲမကြေဘူး။ ဂျပန်ဘုရင်သွားလည်မယ်ဆိုတော့ ဆန္ဒတွေပြကြ ၊ဗုံးတွေခွဲကြတာကြောင့် ဘုရင်လည်မဲ့အစီအစဉ်ဖျက်လိုက်ရတယ်။ စစ်အတွင်းက(၁၉၄၅-၅၂) သူတို့ကို အမေရိကန်တွေလက်ထဲထားခဲ့လို့တဲ့။ ၁၉၇၂ မှာ ဂျပန်လက်အောက်ပြန်ရောက်တယ်။
No comments:
Post a Comment